Тосо ноябрянь 7-це чистэ коень коряс ютась Ледстнемань Парад. Те коесь саевсь аволь чаво таркасто. Ледстнемань Парадось алтазь 1941 иестэ Куйбышев ошсо ютавтозь парадонтень. Ледстямскак историянть, те шкась минек масторонть туртов аволь шождатнестэль. Немецтне эцесть Московонтень. Якстере площадьсэ свал ютавтневиль Ине Октябрьской социалистической революциянтень алтазь военной парад. Ды куш сестэ шкась ульнесь пек стака, арсезель коенть а полавтомс. Ансяк кияк эзь сода, сэтьместэ-аволь сон юты. Немецтне овсе маласольть. Тень чарькодезь, арсезель ютавтомс зярыя парадт, штобу невтемс ятонтень эсь кеме бажамонть – ванстомс тиринь масторонть. Арсезель ютавтомс парадт колмо ошсо: Московсо, Воронежсэ ды Самарасо (сестэ Куйбышевсэ). Меельце ошось ульнесь войнань шкасто омбоце прявт ошокс. Ды, бути Московсо парадонь ютавтомантень немецтне мешавольть, трансляциянть кармавольть бу ветямо Куйбышевстэ. Те тевентень анокстамотне мольсть пек салава.
Самарань парадось лиятнеде явовсь сеньсэ, тосо участникекс ульнесть од самолёттнэ, конатне ансяк нолдазельть. Парадонь командующеекс ульнесь эрзянь цёрась, Дубенкабуень Налитова велестэ армиянь генералось Максим Алексеевич Пуркаев. Сон путсь ламо вийть те парадонть пурнамга. Примась парадонть Климент Ефремович Ворошилов. Куйбышевень торжестватнесэ ульнесть партиянь ды правительствань ответственной роботникть, омбо масторонь атташетнень представительть, Англиянь военной миссиясь, конань прявтсоль Ф.Мэйсон-Макфарлан генерал-лейтенантось. Весе неезесь омбо масторонь представительтнень пек дивавтынзе. 22 тёжат участникть, ламо военной техника. Ламот эйстэст сакшность вемельс: те масторонть виензэ улить! Минек военной вийтнеде кулятне теде мейле пачкодекшнесть ламо масторга. Шабра Япониясь сестэ аштесь Германиянть кис ды учось ансяк шка, штобу каявомс минек масторонть лангс чилисема ёндо. Самарасо парадтонть мейле Япониянь прявттнэ арсезевсть, теемс тень эли арась.
1941 иень парадсонть участвовасть ламо раськень ломанть. Сынст ояксчись лездаськак изнямс истямо виев ятонть. Ошонь куншкакуронь площадьстэнть видьстэ фронтов тусть 3-це ударной армиянь солдаттнэ. Эсь боевой кист ламотне эйстэст прядызь Берлинсэ. Парадсо участвовась соединениянь Якстере Знамяськак, конась мейле кепедезель Рейхстагонть пряс.
Зярыя иеде икеле Ледстнемань Парадось кармась региональноекс. Ней участниктне сакшныть ламо регионтнэстэ. Вана нейгак Самарав парадсо участвовамо пурнавкшность ветерант, курсантт ды кадетт Равчирень федеральной округонь весе регионтнэстэ. Мордовиянь представительтне парадсонть участвовить уш аволь вейке ие. Тедеде истямо правась максозель Саранскоень 30 № общеобразовательной школань кадеттнэнень. Эряви меремс, те школасонть ветяви патриотической покш робота. Ламо иеде икеле тесэ теезельть кадетэнь зярыя класст.
– Кадетэнь васенце классось минек школасо теезель 2011 иестэ, – ёвтни воспитательной роботань коряс директоронь полавтыцясь Валентина Ивановна Лешкина. – Ней истят класстнэде – 28. Эрьва иень Ине Изнямонь чистэнть Саранскоень Советской площадьсэ минек кадеттнэ участвовакшныть Изнямонь Парадсо. Вана те иестэнтькак Парадонть эзинек менстя. Строевой смотрасо минек школань кадеттнэ ютасть пек парсте. Самай секс арсезельгак Самарав кучомс сынст. Парадсонть тедеде ульнесть 52 ломанть. Кочказельть сехте вадрятне. Сынст марто якась сонсь школань прявтось В.Б.Жаров.
Весемезэ парадонь участникекс ульнесть 7 тёжадо ламо ломанть. 2,5 тёжат юнармеецт сакшность Россиянь ламо регионтнэстэ. Сынст туртов коень коряс яволявтозель конкурс, кить седе парсте ютыть строевой эскелькссэ ды морыть строевой моро. Куйбышев лемсэ площадьганть весемезэ ютасть од ломанень 120 отрядт.
Парадонь программась пек сюпаволь. Эрьва иестэ сон алтавиль кодамояк тематикантень. Тедеде алтазель «Солдатонь Славантень».
Шумбракстнемань вал марто участниктненень пшкадсь Самарань областень губернаторось Д.И.Азаров. Чатьмонемань минутадонть мейле площадентень лиссь Советской Союзонь Героесь Владимир Иванович Чудайкин. Мейле седязель гимнась ды ушодовкшнось торжественной маршось. Сехте васенцекс площадьганть ютасть 2-це гвардейской дивизиянь военнослужащейтне. Сынь невтнизь войнань шкань техниканть. Мезть тесэ ансяк арасельть: автомашинат-полуторкат, джипть, мотоциклат, Т-34 танкось. Парадонь ютавтомс военной техниканть максокшнызь музейтне ды частной коллекционертнэ.
Самарань парадсонть примась участия Россиянь Народной артистэсь, Ленинской премиянь лауреатось, актёрось, профессорось Василий Семёнович Лановой. Сон налксесь пек ламо рольть военной кинофильматнесэ. Самарань парадтнэсэ В.С.Лановой уш нилецеде. Актёрось ловнось С.Орловонь стихензэ, морась военной морот. Те шкастонть менельганть ливтясь ИЛ-2 штурмовикесь. Войнань шкасто сонзэ эйсэ ливтнесь Северной флотонь 46 № штурмовой полконь лётчикесь Валентин Скобельцев. 1943 иестэ сонзэ правтокшнызь немецень зенитчиктне.
Мейле яволявтозель парадонь расчёттнэнь торжественной маршось. Сонзэ ушодызь Казанень суворовской училищань барабанщиктне. Мельгаст сыргасть Кировонь, Оренбургонь, Саратовань, Ульяновскоень, Стерлитамаконь, Марий Элэнь расчёттнэ. Седе тов ютасть Саранскоень 30 № школань кадеттнэ. 9-це классонь тонавтницятне Вадим Девятов, Александр Асташкин ды Антон Вельмискин истямо парадсо васенцедельть. Сынь покш мельспаросот, савсь улемс исторической парадонь койтнень поладыцякс. Истямо ёжомарямост парадонь лия участниктненьгак.
– Истямо парадсо участиясь максы од ломантненень ламо, – ёвтни седе тов Валентина Ивановна. – Эрьва участникесь мари покш мельспаро тиринь масторонзо кис, мари сонзэ покш виензэ, лови эсь прянзо те масторонть пельксэкс, ды, бути сыть стака шкат, эрьвась эйстэст апак кавтолдо сти тиринь масторонь ванстомо.